Shwe Pann Thee Knowledge ဂျပန်မ အသိမိတ်ဆွေတစ်ယောက်ရဲ့ သဘောကျစရာ သူ့သားလူပျိုကို ဆုံးမပုံလေး

ဂျပန်မ အသိမိတ်ဆွေတစ်ယောက်ရဲ့ သဘောကျစရာ သူ့သားလူပျိုကို ဆုံးမပုံလေး



ဂျပန်မ အသိမိတ်ဆွေတစ်ယောက်ရဲ့ သူ့သားလူပျိုကို ဆုံးမပုံလေး ကြားလိုက်ရတာ သဘောကျလွန်းလို့ပါ..

သူ့သားက တက္ကသိုလ်ကျောင်းသား (၂၃)နှစ်.. စာတော်တယ်.. လိမ္မာတယ်.. အားတဲ့အချိန် အချိန်ပိုင်း အလုပ်လုပ်ရင်း သူ့မုန့်ဖိုးသူရှာတယ်.. ကျောင်းစရိတ်ထဲလည်း ထည့်တယ်.. အလုပ်ထဲမှာ သူ့သားနဲ့ အဆင်မပြေတဲ့ လူတစ်ယောက်ရှိတယ်.. အဲဒီလူက အလုပ်လက်မဲ့.. အမြဲတမ်း အလုပ်မရှိသူ.. ပညာက တစ်ပိုင်းတစ်စ.. တက္ကသိုလ်ကျောင်းသားကို မနာလိုတာလည်းပါတယ်..

ခဏခဏ ပြဿနာတက်ကြတယ်.. အလုပ်ထဲက ပြဿနာကို ဆိုင်တာဝန်ခံက ဝင်ဖြေရှင်းပေး မီးအေးသလိုလိုရှိသွားမှ ထပ်ဖြစ်ကြပြန်တယ်.. ဒီတစ်ခါတော့ မိုက်ရင်ချမလားတွေအထိ ဖြစ်ကုန်တယ်.. မြစ်ကမ်းဘေးကွက်လပ်မှာ ချိန်းသတဲ့..

ဂျပန်တက္ကသိုလ်ကျောင်းသားလေးက သူ့အမေကို ပွင့်ပွင့်လင်းလင်းဖွင့်ပြောတယ်.. သူသွားဆော်မယ်ပေါ့.. လူငယ်ဆိုတော့လည်း စိန်ခေါ်တာကို လက်ခံတာနဲ့တူပါရဲ့.. သူ့အမေက သူ့သားကို မတားဘူး.. စကားတစ်ခွန်းပဲ ပြောတယ်..

“သားတို့ တုတ်တွေဘာတွေနဲ့ ရိုက်ကြမှာမလား..? ခေါင်းကို ရိုက်ကြမှာပေါ့.. ဟုတ်လား..? သားခေါင်းကို သူကရိုက်မိရင် သားတစ်သက်လုံးက အသိပညာတွေ ထည့်လာတဲ့ တန်ဖိုးရှိတဲ့ ဦးနှောက်တွေ ထွက်ကျကုန်မှာပေမယ့်.. သူ့ခေါင်းကို သားကရိုက်မိရင် ဘာတွေထွက်ကျလာမယ် ထင်သလဲ..? အဲဒီနှစ်ခုဟာ လဲရတာ တန်တယ်ထင်သလား.. တန်တယ်ထင်ရင် သွား..”

ကောင်းလိုက်တဲ့ ဆုံးမစကား.. နမူနာ ယူထားလိုက်တယ်.. မြန်မာ စကားပုံရှိတယ်.. “ပညာစွန်း ချွန်းနဲ့အုပ်” လို့ ခေါ်တယ်.. “ပညာတတ်တွေက သတိတစ်ချက်လစ်လိုက်မိလို့ အစွန်းထွက်လာခဲ့ရင် ဆင်ရိုင်းကို ချွန်းနဲ့အုပ်ပြီး ထိန်းသလို ကိုယ့်ကိုယ်ကိုယ် ထိန်းတတ်ရမယ်လို့ ဆိုလိုတယ်..” ဦးနှောက်ရဲ့ တန်ဖိုးချင်းမတူရင် အလဲအထပ် မလုပ်တာကမှ ပညာတတ်လို့ခေါ်တယ်..

ယုမိကိုထံမှ.. အောင်နိုင်ထွန်း (မြန်မာစာ)

Leave a Reply

Your email address will not be published.